ವಕೀಲರ ಪರಿಷತ್ತಿನ ಹಳೆಯ ಕಟ್ಟಡಕ್ಕೆ ಮುಕ್ತಿ: ರೇಸ್ ಕೋರ್ಸ್ನಲ್ಲಿ 2 ಎಕರೆ ಜಾಗ ಮಂಜೂರು ಮಾಡುವುದಾಗಿ ಡಿಕೆಶಿ ಘೋಷಣೆ
ನೂತನ ಕಟ್ಟಡವನ್ನು ನಿರ್ಮಿಸಲು ತೀರ್ಮಾನಿಸಲಾಗಿದ್ದು, ಇದೇ ಪ್ರದೇಶದಲ್ಲಿ ಕರ್ನಾಟಕ ರಾಜ್ಯ ವಕೀಲರ ಪರಿಷತ್ಗೆ ಎರಡು ಎಕರೆ ಜಾಗ ಮಂಜೂರು ಮಾಡಲಾಗುವುದು ಎಂದು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಭರವಸೆ ನೀಡಿದ್ದಾರೆ ಎಂದು ರಾಜ್ಯ ವಕೀಲರ ಪರಿಷತ್ ಪ್ರಕಟಣೆ ತಿಳಿಸಿದೆ.
ಪರಿಷತ್ನ ನೂತನ ಸದಸ್ಯರು ಆಡಳಿತಾತ್ಮಕ ಮಂಡಳಿ ಅಧ್ಯಕ್ಷ ವಿ.ಡಿ.ಕಾಮರೆಡ್ಡಿ ಅವರ ನೇತೃತ್ವದಲ್ಲಿ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರನ್ನು ಬುಧವಾರ ಕುಮಾರಕೃಪಾ ಅತಿಥಿ ಗೃಹದಲ್ಲಿ ಭೇಟಿ ಮಾಡಿ ಮಾತುಕತೆ ನಡೆಸಿದ ಸಂದರ್ಭದಲ್ಲಿ ಈ ಭರವಸೆ ನೀಡಿದ್ದಾರೆ ಎಂದು ರಾಜ್ಯ ಕಾರ್ಯದರ್ಶಿ ಬಿ.ವಿ.ಮಧುಸೂದನ ತಿಳಿಸಿದ್ದಾರೆ.
ಕರ್ನಾಟಕ ರಾಜ್ಯ ವಕೀಲರ ಪರಿಷತ್ 1961ರಿಂದ ಕಾರ್ಯ ನಿರ್ವಹಿಸುತ್ತಿರುವ ಸ್ವಾಯತ್ತ ಸಂಸ್ಥೆಯಾಗಿದೆ. ಸಂಸ್ಥೆಗೆ ತನ್ನದೇ ಆದ ಸುಸಜ್ಜಿತ ಕಟ್ಟಡ ಅಥವಾ ಜಾಗವಿಲ್ಲ ಎಂಬ ಪರಿಷತ್ನ ಮನವಿಯನ್ನು ಮುಖ್ಯಮಂತ್ರಿಗಳು ಗಂಭೀರವಾಗಿ ಪರಿಗಣಿಸಿ ಈ ಭರವಸೆ ನೀಡಿದ್ದಾರೆ ಎಂದು ತಿಳಿಸಲಾಗಿದೆ.
ನಿಯೋಗದಲ್ಲಿದ್ದ ಪ್ರಮುಖರು:
ಈ ನಿಯೋಗದಲ್ಲಿ ಅಡ್ವೊಕೇಟ್ ಜನರಲ್ ಕೆ.ಶಶಿಕಿರಣ ಶೆಟ್ಟಿ, ಪರಿಷತ್ತಿನ ನೂತನ ಸದಸ್ಯರಾದ ಶಿವಮೂರ್ತಿ ಎಂ.ಎನ್., ಮಧುಸೂಧನ, ಎಂ.ದೇವರಾಜ್, ಎಸ್.ಎಫ್.ಗೌತಮ್ ಚಂದ್, ಆರ್.ರಾಜಣ್ಣ, ವಿ.ಡಿ.ಕಾಮರಡ್ಡಿ, ಸಿ.ಎಂ.ಧನಂಜಯ, ಶ್ಯಾಮಲಾ ಭಂಡಾರಿ, ಎಸ್.ಹರೀಶ್, ಜೆ.ಪಿ.ಶೇಖರ್, ಎನ್.ಶಿವಕುಮಾರ್, ಪಿ.ವಿ.ಕಲ್ಪನಾ, ಕೆ.ಶೈಲಜಾ, ಕೋರಿಮಠ ಬಸವಣ್ಣಯ್ಯ ವಿರೂಪಾಕ್ಷಯ್ಯ, ವಿ.ವಿದ್ಯಾರಾಣಿ, ಸಂಧ್ಯಾ ಬಿ.ಮಾದಿನೂರು ಮತ್ತು ಕೆ.ಕೆ.ತುಕಾರಾಂ ಅವರು ಇದ್ದರು.
ಹೋರಾಟ ಮತ್ತು ಹಿನ್ನೆಲೆ:
ದೀರ್ಘಕಾಲದ ಕೊರತೆ: 1961ರಲ್ಲಿ ಸ್ಥಾಪನೆಯಾದ ಕರ್ನಾಟಕ ರಾಜ್ಯ ವಕೀಲರ ಪರಿಷತ್, ದಶಕಗಳಿಂದ ಸ್ವಾಯತ್ತ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುತ್ತಿದ್ದರೂ ತನ್ನದೇ ಆದ ಸ್ವಂತ ಜಾಗ ಅಥವಾ ಸುಸಜ್ಜಿತ ಕಚೇರಿ ಕಟ್ಟಡವನ್ನು ಹೊಂದಿರಲಿಲ್ಲ.
ಸರ್ಕಾರದ ಭರವಸೆ: ಪರಿಷತ್ನ ನೂತನ ಪದಾಧಿಕಾರಿಗಳ ನಿಯೋಗವು ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರನ್ನು ಭೇಟಿ ಮಾಡಿ ಮನವಿ ಸಲ್ಲಿಸಿದಾಗ, ಬೆಂಗಳೂರಿನ ರೇಸ್ ಕೋರ್ಸ್ನಲ್ಲಿ ಹೈಕೋರ್ಟ್ನ ಹೊಸ ಕಟ್ಟಡ ನಿರ್ಮಿಸುವ ಆವರಣದಲ್ಲೇ KSBC ಆಡಳಿತಾತ್ಮಕ ಕಟ್ಟಡಕ್ಕಾಗಿ 2 ಎಕರೆ ಜಾಗ ಮಂಜೂರು ಮಾಡಲು ಸರ್ಕಾರ ಒಪ್ಪಿಗೆ ಸೂಚಿಸಿದೆ.
