135 ನಿಮಿಷಗಳಲ್ಲಿ 250 ಕೇಸ್ ಇತ್ಯರ್ಥ: ಹೈಕೋರ್ಟ್ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿಂದ ಹೊಸ ದಾಖಲೆ

ಬೆಂಗಳೂರು: ಕರ್ನಾಟಕ ಹೈಕೋರ್ಟ್‌ನ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರು ನ್ಯಾಯಾಂಗ ಕ್ಷಿಪ್ರ ವಿಚಾರಣೆಯಲ್ಲಿ ಅಪರೂಪದ ಸಾಧನೆ ಮಾಡುವ ಮೂಲಕ ಹೊಸ ದಾಖಲೆ ನಿರ್ಮಿಸಿದ್ದಾರೆ. ಕೋರ್ಟ್ ಹಾಲ್-14ರ ಮೊದಲ ಪಟ್ಟಿಯಲ್ಲಿದ್ದ ಎಲ್ಲಾ 250 ಪ್ರಕರಣಗಳ ವಿಚಾರಣೆಯನ್ನು ಕೇವಲ 135 ನಿಮಿಷಗಳಲ್ಲಿ ಪೂರ್ಣಗೊಳಿಸಿ ವಿಲೇವಾರಿ ಮಾಡುವ ಮೂಲಕ ಅವರು ಗಮನಸೆಳೆದಿದ್ದಾರೆ. ಬೆಳಿಗ್ಗೆ 10:30ಕ್ಕೆ ಆರಂಭವಾದ ಕಲಾಪದಲ್ಲಿ ಮಧ್ಯಾಹ್ನ 12:45ರ ವೇಳೆಗೆ ಮೊದಲ ಪಟ್ಟಿಯ ಕಲಾಪವನ್ನು ಪೂರ್ಣಗೊಳಿಸಲಾಗಿದ್ದು, ಪ್ರತಿ ಪ್ರಕರಣದ ವಿಚಾರಣೆಗೆ ನ್ಯಾಯಪೀಠ ತೆಗೆದುಕೊಂಡ ಸರಾಸರಿ ಸಮಯ ಕೇವಲ 32 ಸೆಕೆಂಡುಗಳು. ಮೊದಲ ಪಟ್ಟಿಯ 250 ಪ್ರಕರಣಗಳನ್ನು ಯಶಸ್ವಿಯಾಗಿ ವಿಲೇವಾರಿ ಮಾಡಿದ ತಕ್ಷಣವೇ ನ್ಯಾಯಪೀಠವು 161 ಪ್ರಕರಣಗಳನ್ನೊಳಗೊಂಡ ಎರಡನೇ ಪಟ್ಟಿಯ ವಿಚಾರಣೆಯನ್ನು ಕೈಗೆತ್ತಿಕೊಂಡಿತು. ವೇಗದ ನ್ಯಾಯದಾನ ಹಾಗೂ ಪರಿಣಾಮಕಾರಿ ಕಲಾಪ ನಿರ್ವಹಣೆಯಲ್ಲಿ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರು ಬರೆದಿರುವ ಈ ಹೊಸ ದಾಖಲೆಯು ನ್ಯಾಯಾಂಗ ಕ್ಷೇತ್ರದಲ್ಲಿ ವ್ಯಾಪಕ ಪ್ರಶಂಸೆಗೆ ಪಾತ್ರವಾಗಿದೆ.

ಕರ್ನಾಟಕ ಹೈಕೋರ್ಟ್‌ನ ಪ್ರಮುಖ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರು ತಮ್ಮ ಅಸಾಧಾರಣ ಕಾರ್ಯವೈಖರಿ ಮತ್ತು ವೇಗದ ಪ್ರಕರಣಗಳ ವಿಲೇವಾರಿಯಿಂದ ನ್ಯಾಯಾಂಗ ಕ್ಷೇತ್ರದಲ್ಲಿ ಜಾಗತಿಕ ಗಮನ ಸೆಳೆದಿದ್ದಾರೆ. ಬಿಎಂಎಸ್ ಕಾನೂನು ಕಾಲೇಜಿನಲ್ಲಿ ಕಾನೂನು ಪದವಿ ಪಡೆದಿರುವ ಇವರು, 26 ನವೆಂಬರ್ 2019 ರಂದು ಹೆಚ್ಚುವರಿ ನ್ಯಾಯಮೂರ್ತಿಯಾಗಿ ಹಾಗೂ 8 ಸೆಪ್ಟೆಂಬರ್ 2021 ರಂದು ಖಾಯಂ ನ್ಯಾಯಮೂರ್ತಿಯಾಗಿ ನಿಯುಕ್ತರಾದರು. ತಮ್ಮ 5 ವರ್ಷಗಳ ಸೇವಾವಧಿಯಲ್ಲಿ 16,500ಕ್ಕೂ ಹೆಚ್ಚು ಪ್ರಕರಣಗಳನ್ನು ವಿಲೇವಾರಿ ಮಾಡಿದ್ದ ಇವರು, ನವೆಂಬರ್ 2025ರ ವೇಳೆಗೆ ಒಟ್ಟು 21,924 ಪ್ರಕರಣಗಳನ್ನು ವಿಲೇವಾರಿ ಮಾಡುವ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.